26.9 C
Solapur
February 29, 2024
पंढरपूर

स्वेरीचा ॲटलास कॉपको सोबत सामंजस्य करार.

सचिन झाडे –
पंढरपूर:-

गोपाळपूर (ता. पंढरपूर) येथील श्री विठ्ठल एज्युकेशन अॅण्ड रिसर्च इन्स्टिटयूट संचलित कॉलेज ऑफ इंजिनिअरींगचा पुण्यातील ‘ॲटलास कॉपको’ सोबत नुकताच सामंजस्य करार झाल्याची माहिती संस्थेचे संस्थापक सचिव व कॉलेज ऑफ इंजिनिअरींगचे प्राचार्य डॉ.बी.पी.रोंगे यांनी दिली.

हा करार स्वेरीच्या विद्यार्थी संशोधक व प्राध्यापकांना एका नवीन क्षेत्रासंबंधातील कौशल्य वाढीस उपयुक्त ठरणार आहे. स्वेरीतील प्राध्यापकांचा संशोधनातील अनुभव विचारात घेवून या कंपनीने सामंजस्य करार केला आहे. या सामंजस्य करारावर ॲटलास कॉपको कंपनीचे मानव संसाधन व्यवस्थापक कबीर गायकवाड व महाविद्यालयातर्फे स्वेरीचे संस्थापक सचिव व कॉलेज ऑफ इंजिनिअरींगचे प्राचार्य डॉ.बी.पी.रोंगे यांनी स्वाक्षऱ्या केल्या. ‘ॲटलास कॉपको’ बरोबर झालेल्या सामंजस्य करारामुळे स्वेरीमधील संशोधक व प्राध्यापक यांना इंडस्ट्रियल टूल आणि इक्यूपमेंट मॅन्युफॅक्चरिंग तसेच नवीन क्षेत्रामध्ये त्यांचे कौशल्य दाखविण्याची संधी प्राप्त झाली आहे.

ॲटलास कॉपको सोबत स्वेरीमधील प्राध्यापक व संशोधक यांची तांत्रिक बाबीं संदर्भात देवाण घेवाण होणार आहे तसेच या करारातून विद्यार्थ्यांना नवीन तंत्रज्ञानाची माहिती, कौशल्य विकास आणि नोकरी विषयक विविध संधी प्राप्त होणार आहेत. यापूर्वी स्वेरीचे राष्ट्रीय व आंतरराष्ट्रीय स्तरावरील इतर ३१ कंपन्यांबरोबर सामंजस्य करार स्थापित झालेले आहेत. अशा करारामुळे स्वेरीमध्ये शिक्षणाबरोबरच संशोधनाचे वातावरण निर्माण झाले आहे. ग्रामीण भागातील विद्यार्थ्यांना तंत्रशिक्षण मिळावे या हेतूने १९९८ साली अभियांत्रिकी महाविद्यालयाची सुरवात झाली. तेथून पुढे विद्यार्थ्यांना केवळ शिक्षण देणे एवढ्यावरच न थांबता त्यांचा कल संशोधनाकडे कसा वळविला जाईल हे पाहून त्या दृष्टीने संस्थेने पाऊले उचलली आहेत.

याच कारणामुळे आता ग्रामीण भागातील विद्यार्थ्यांबरोबरच शहरी व परराज्यातील विद्यार्थी देखील ‘स्वेरी’ कडे शिक्षणासाठी वळत आहेत. भारत सरकारच्या भाभा अनुसंशोधन केंद्रासह इतर अनेक संस्थाबरोबर झालेल्या करारामुळे आजमितीस संशोधनासाठी रु. साडेसात कोटी पेक्षा जास्त निधी उपलब्ध झाला आहे. स्वेरीचे विद्यार्थी कॅम्पस प्लेसमेंट आणि विद्यापीठात सर्वोच्च निकाल मिळविण्याबरोबरच संशोधनाकडे वळत आहेत. ही सोलापूर जिल्ह्यालाच नव्हे तर महाराष्ट्रालादेखील गौरवाची बाब आहे. हा करार पूर्ण होण्यासाठी शैक्षणिक अधिष्ठाता डॉ. प्रशांत पवार, संशोधन अधिष्ठाता डॉ. संतोष साळुंखे व प्रा. अविनाश मोटे यांनी परिश्रम घेतले.

या करारामुळे संस्थेचे अध्यक्ष नामदेव कागदे, उपाध्यक्ष अशोक भोसले यांच्यासह पदाधिकारी व विश्वस्त, स्वेरी अंतर्गत असलेल्या इतर महाविद्यालयांचे प्राचार्य, अधिष्ठाता, विभागप्रमुख, प्राध्यापक वर्ग, शिक्षकेतर कर्मचारी, विद्यार्थी व पालक यांनी अभिनंदन केले.

Related posts